National Medical Commission (NMC) hmang ṭan

India rama medical education thuneitu sang, National Medical Commission siam thar chu nimin aṭang khan hman ṭan a ni ta. 

Sorkar laipui chuan a hmaa medical education chungchanga thuneitu sang ber ni ṭhin, Board of Governors-Medical Council of India (BoG-MCI) chu Ningani khan titawpin, nimin khan a thlaktu atana siam NMC hi hman ṭan a ni ta a ni. 

MCI-ah eirukna a awm nia sawi a nih avangin sorkar laipui chuan kum 2018 khan a titawp a; Dr VK Paul, member (health) Niti Aayog kaihhruai BoG in thlak a ni. Indian Medical Council (IMC) Act, 1956 kaihhruaina hnuaiah a awm a ni. 

NITI Aayog chuan MCI thlakna turin NMC din hi a rawt a, he rawtna hi state tam zawkin an pawm hnuah Prime Minister in a pawm leh a, chumi hnuah Parliament-ah pass a ni ve leh a ni. President-in August 8, 2019 a hming sign-a a pawm hnuah IMC Act thlakna, NMC Act chu neih a ni ta a ni. 

NMC-ah hian member 33 an awm a, commission hotu atan hian chairperson AIIMS, New Delhi-a thawk ENT department head hlui professor Suresh Chandra Sharma chu ruat a ni. Ex officio member 10 an awm bawk a, member 22 dang te chu part time tur an ni bawk.