UP CM-in ei siamna hmuna thawkte hming tarlang vek turin hriattir

Uttar Pradesh chief minister Yogi Adityanath chuan an state chhunga ei siamna hmunah a thawktu, neitu leh manager te hming leh address chu mitin hmuh theiha tarlang vek turin a hriattir. Chef leh waiter-te pawh mask leh glove hmang vek turin a ti a, hotel leh restaurant-ah CCTV camera dah ngei ngei turin a ti bawk.

Tun hnaiah UP-ah hian ei tur siama chil chhak leh zun nena an pawlh lai video te a darh a,hei vang hian CM pawhin thupek hi a ti chhuak a ni. Adityanath chuan high-level meeting ah ei tur siama mihring taksa aṭanga thil tenawm chhuak te pawlh chu thil tenawm tak a ni tiin, hetianga ti man chhuahte chungah chuan hremna na tak lekkawh a ni zel dawn tih a sawi.

Kar hmasa khan Ghaziabad district-a theitui zuar pakhat chuan a theitui siamah a zun a pawlh lai hmuh niin man nghal a ni a, June thla khan Noida-a mipa pahnih chu an theitui zawrhah chil an chhak avangin man an ni tawh bawk. September 12 a Saharanpur district-a tleirawl ei siamin a roti siam laiah chil a chhak lai video social media lama a darh vak hnuah a dawr nei tu chu man nghal niin hemi nghawng zelah hian thupek khauhtak hi siam a ni zui ta a ni.

Chief Minister chuan ei tur lam siamna hmun hrang hrangte uluk taka zirchian a ni dawn a, heng hmuna thawkte pawh police-ten an pawmpui vek a ngai dawn a ni tiin, ei tur thianghlim leh him chauh pek chhuah a nih theihna turin a ṭul angin Food Safety and Standards Act pawh siamṭhat a ni ang, a ti.