State leh UT-te school himna atana kaihhruaina siam kalpui vek turin hriattir

Supreme Court chuan Thawhlehni khan state leh Union Territory-te chu sorkar laipuiin school himna tura kaihhruaina a siamte chu kalpui vek turin a hriattir.

Justice BV Nagarathna leh N Kotiswar Singh te ṭhutna bench chuan kum 2021-a union education ministry-in school tana kaihhruaina a siamte hmang ngei tura NGO Bachpan Bachao Andolan(BBA) ngenna thlen chu an ngaihtuah a. NGO aiawha ding, senior advocate HS Phoolka chuan kum 2021-a school-a himna inkaihhruaina tih chhuah, ‘Guidelines on School Safety and Security’ chu tun thlengin state panga chauhin an la hmang niin a sawi. Phoolka chuan nu leh pa tam tak chuan an fate school luhna chu a him tawk angem tih ngaihtuah leh hlauthawng reng renga an awm thu sawiin, hei vang hian ngenna pawh hi thlen an nih thu a sawi.

"He inkaihhruaina hian naupangte chu an taksa, rilru leh ngaituahna thlengin tihduhdah an tawhna tur lakah venhimna tura siam leh a tum ber a ni. Hei vang hian hun tiam chhunga hmang vek tura tih a ṭul a ni," a ti.