BJP MP Kangana-in 'farm law' sut tak hman a duh

BJP MP Kangana Ranaut chuan sawizui hlawh tak ṭawngkam a nei leh a, loneituten an dodal avanga sorkar laipuiin farm law pathum a siam a sut leh takte chu hman a duh thu a sawi.

Thawhlehni khan MP Ranaut hian sorkar laipuiin farm law a sutna chu ṭhiat a, loneitute hamṭhatna turin hman ṭha a tih thu a sawi. Hei hi eptu party hrang hrangte chuan na takin an rawn sawisel zui nghal a ni.

Mandi MP, Ranaut chuan "Ram hmasawnna tur hian loneitu te hi ban pawimawh tak an ni a, hengte avang hian anmahni ngeiin an hamṭhatna tur atan hian dan pathumte hi hman a nih theihna atan thlen se ka duh a ni. Heng dan siam tharte hi state tlemte chauhin an dodal a, loneitute dinhmun thlirin ngaihtuah ṭhat leh a ngai. Loneituten hlawkna an telna turin heng dante hi hman dan tur ngaihtuah ṭha leh turin ka ngen a ni," a ti.

Congress party chuan Kangana Ranaut thusawina video hi an X-ah dah lang nghalin, heng dan sut tawhte hi PM Modi leh a MP-te chuan eng ang pawhin hman leh tumin bei mah se, an remti ngai dawn lo tih a sawi. Congress thupuangtu Supriya Shrinate chuan loneituten an duh loh em em, farm law pathumte chu hman tumah PM leh BJP chu a puh zui bawk. Srinate chuan, 'Loneitu 750 chuangin an nun an hlan hnuah chauh Modi-a sorkar chuan heng dan ṭha lo lutuk te hi a hnukkir duh chauh a ni. Tunah BJP MP-te chuan lakkir leh tumin an bei chho leh a, mahse Congress chu loneitute lamah a ṭang zel ang," a ti.

Aam Aadmi Party pawhin Ranaut thusawi an dem thu sawiin, BJP chu an MP hmanga vantlang nunphung ti derthawng thei thil an ti ṭhin chu pawi an tih thu an tarlang. AAP MP Malvinder Singh chuan heng dan huathlala tak takte hi sorkar laipui hian a la kir leh a nih chuan ram chhunga loneitu maktaduai tel leh martar 750 te hmuhsitna leh zah lohna lantirna a ni ang, a ti bawk.