ICMR-in ni khatah sample nuai 14 chuang endik

India ramchhung hmun hrang hrangah nimina sorkar report tihchhuah thlengin hri kai hmuh chhuah nuai 58 chuang an awm tawh a, mi 92k chuangin an thihpui tawh. Hri kai pun chak rual hian Indian Council of Medical Research (ICMR) lam pawhin sample endik hna an thawk chak hle a, nimina report an tihchhuahah chuan ni khatah sample nuai 14 chuang an endik.

India ram chu hripui kai tam ber dawttu ram a la nih chhunzawm zel a, hri kai tamna ber USA-ah chuan mi nuai 70 chuangin hri an kai tawh thung.

Ministry of Health and Family Welfare-in nimina report a tihchhuahah chuan Ningani khan hri kai hmuh chhuah thar mi 86, 052 an awm a, dama puan mi 81, 117 an awm bawk. Ni ruk chhung a zawna hri kai hmuh chhuah thar aia enkawl dam an tam hnuah nimin report-ah khan hri kai hmuh chhuah thar an tam zawk ve leh ta a ni.

Darkar 24 chhungin mi 1,141 laiin an thihpui leh bawk.Nimina sorkar report tihchhuah thleng khan India ramah hri kai hmuh chhuah 58,18,570 an awm tawh a, chung zinga 47,56,164 chu enkawl dam an ni leh tawh thung. Hri vanga thi 92,290 an awm tawh a, 9,70,116-in hri an la kai mek a ni.

Indian Council of Medical Research (ICMR) chuan nimina report an tihchhuahah Ningani khan sample 14,92,409 an endik tih an tarlang. Hri len ṭantirh aṭanga nimina report an tihchhuah thleng khan sample 6,89,28,440 an endik tawh.

ICMR hian sample endikna tura laboratory pawmpui 1,818 an nei tawh a, chung zinga  1,084 chu sorkar laboratory a ni a, 734 chu private laboratory a ni thung.