AAP atangin Bhushan leh Yadav-te an hnawtchhuak
Delhi-a rorellai, Aam Aadmi Party (AAP) chuan an party hruaitu hlui pahnih, Prashant Bhushan leh Yogendra Yadav-te chu an party aṭangin a hnawtchhuak ta.
Bhushan leh Yadav-te hi an party kalphung leh party hotu lu ber, Arvind Kejriwal-a lakah an lungawi lo a, an lungawi lohnate hi mipuite vantlang hriatah an puang chhuak a ni. Party duhdan kalha cheah puhin, party-a chanvo pawimawh an neihte pawh hlihsak an ni bawk.
Hemi hnu hian hruaitu hel pahnihte hian party hriatpui lohin, anmahni thlawptute nen Delhi-ah convention an nei a, hetah hian AAP chhuahsan chuang si loin non-political group 'Swaraj Abhiyan' an din a ni.
AAP chuan hruaitu hel pahnihte hi party duhdan kalha che a, convention an buatsaih leh, group thar an din chungchangah insawifiah turin hriattirna a pe a, hei hi a chhannaah Bhushan chuan an thiltih chuan code of conduct a palzut lo tiin a sawi a, an thiltih avang hian thupha an chawi duh lo a ni.
Hruaitu pahnihte hi party duhdan kalha cheah puhin, Thawhṭanni zan khan AAP national disciplinary committee chuan an party aṭangin a hnawtchhuak a, an rual hian hruaitu hel dang pahnih, Anand Kumar leh Ajit Jha-te pawh hnawhchhuah an ni bawk.
Yadav leh Bhushan-te chuan party aṭanga hnawhchhuah an ni chu an rilru a na hle tih an sawi a, hemi rual hian Yadav chuan, "Hei hi a tir aṭang an kalpui tum dan kha a nih avangin mak pawh ka ti hran lo. Mahse an thutlukna siam hian ka rilru chu a ti na hle a ni. Nangma in ngei aṭanga hnuksawn a, an paihchhuah che chuan na in ti ve hle ang," a ti.
Prashant Bhushan-a pa, Shanti Bhushan chuan a fapa thlavang hi hauhin, AAP hotu leh Delhi Chief Minister Arvind Kejriwal-a chu na takin a bei nghal a, "Arvind Kejriwal kan lo pawm kha kan tihsual lian tak a ni. Tunah chuan Hitler-a thar a ni ringawt tawh a ni," tiin a sawi.