Ramdev-a'n cabinet minister status a hnar

Yoga guru, Ramdev chu Haryana sorkarin cabinet rank pek a tum a, mahse Ramdev hian hei hi hnarin, ministerial post chu a thil duh a ni lo a, 'baba' nih chhunzawm zel a duh zawk tih a sawi.

Nimin khan Haryana sorkar hian Delhi aṭanga km 60 vela hla, Rai-ah Ramdev-a chawimawina hun a hmang a, hetah hian Ramdev chuan cabinet status pek tumna hi a hnar thu a sawichhuak a ni.

Haryana-a BJP sorkar chuan April 13 khan Ramdev hi cabinet rank status pek a tum thu a lo puang tawh a, hei hi eptu party Congress chuan nasa taka sawiselin, Ramdev tihlawm a tumnaah BJP sorkar chu awm lo khawpa thiltiah a puh a ni. Mahse sorkar chuan hemi chungchangah hian official-in thuchhuah a la siam lo.

Rai-a inkhawm buatsaihah Ramdev hian thu sawiin, "State sorkarin chawimawina min pek a tum hi lawmawm ka ti a, mahse 'baba' leh 'fakir' ni chunga rawngbawl chhunzawm zel hi ka duh zawk a ni," a ti. Hemi rual hian yoga leh ayurveda chawilar tura state brand ambassador nih chhunzawm zel erawh a tum thu a sawi.