PM Modi-an Giriraj a zilh

Union Minister Giriraj Singh-a'n vun rawnga inthliarna lam hawia Congress President Sonia Gandhi chungchang a sawi avanga eptute'n nawr angin Thawhṭanni khan Parliament inkhawmah thupha a chawi tawh a, nimin khan Prime Minister Narendra Modi chuan minister hi a thusawi avang hian a zilh leh.

Nimin zing khan Giriraj Singh hian PM Modi hi a office-ah a hmu a, hetah hian PM chuan na taka zilhin, minister hi a mittui a tla hial nia sawi a ni. Singh chuan a hnuah PM hi a hmuh loh thu leh, a ṭah loh thu a sawi thung.

Mahse BJP hruaitu, Venkaiah Naidu chuan, "Inchhir thu sawi hian kan nihna a tihnep phah lo. Giriraj hian a inchhir thu a sawi hnuah beih zui reng a ni a, hei hian a rilru a ti na em a ni," a ti.

Giriraj hian Sonia Gandhi chu mingo a nih vangin Congress party chuan hruaitu atan an pawm thei niin a sawi a, Rajiv Gandhi khan Nigeria mi nupuiah lo nei ni se, thil awmdan chu a danglam ngei ang, a ti a ni.

A thusawi avang hian Congress party chuan Giriraj hi minister a nihna aṭanga bantir an phut bakah, PM Modi chu a minister thusawi avang hian thupha chawi turin an phut bawk.