2019: Kum 16 chhunga inkahhai bawhchhiat hnem ber kum

Nikum chhung khan Jammu and Kashmir (J&K)-a Pakis­tan leh India ramri (Indo-Pak border)-ah, Pakistan sipaite chuan inkahhai vawi 3,289 an bawhchhia. Hei hi kum 16 chung­a Indo-Pak border-a inkahhai bawhchhiat hnem ber ṭum a ni.

J&K-a special status Article 370 hlih a nih thla, August aṭang khan Pakistan sipaite chuan inkahhai hi vawi 1,565 an bawhchhia a ni. October thla khan inkahhai hi vawi 398 bawhchhiat niin, hei hi nikum chhunga inkahhai bawhchhiat hnem ber thla a ni. November-ah khan vawi 333 bawhchhiat a ni a, August-ah - 323, July- 314, September- 308  leh March-ah 275 bawhchhiat a ni tih  Ministry of Home Affairs (MHA) chuan a tarlang. Pakistan sipai-te hian kum 2018 khan Pakistan leh India ramriah inkahhai vawi 2,936 an bawhchhe thung. Inkahhai bawhchhiat avang hian mi 61 an thih bakah, mi 250 chuangin hliam an tuar a ni. Nitinin vawi 8 zel bawhchhia ang an ni bawk. 

Kum 2017 khan vawi 971 inkahhai bawhchhiatna thlengin, hliam 151 an awm bakah, mi 31 an thi a, heng zinga mi 12-te chu civil mi an ni.  

India leh Pakistan ramri thui zawng hi kilometre 3,323 a ni a, chung zinga km 221 chu International Border (IB) a ni. Km 740 chu J&K-a Line of Control (LoC) a ni thung.

Atal Bihari Vajpayee prime mi­nister a nih lai, November 26, 2003 khan Pakistan nena ramria inkah­hai puanna thuthlung hi ziah a ni.