Damdawi 53 in quality test paltlang lo

Central Drug Standards Control Organisation(CDSCO) chuan ram chhunga siam damdawi 50 chuangin quality test an paltlang lo a, hei vang han fimkhur a ngai hle tih a sawi.

CDSCO August 2024 report-in test paltlang lo, “Not of Standard Quality (NSQ Alert)” category-a a dah zingah hian paracetamol, vitamin D, leh calcium supplement te bakah hian thisen sang damdawi leh anti-diabetes pill ṭhenkhat an tel. State drug officer-ten thla tina sample an endik aṭangin NSQ alert hi siam a ni ṭhin.

Damdawi a ṭhat tawk leh tawk loh fiahna paltlang lo zingah hian Vitamin C and D3 tablets, Shelcal, vitamin B complex, vitamin C softgels, anti-acid Pan-D, paracetamol tablets (IP 500 mg), anti-diabetic drug Glimepiride leh thisen sang damdawi Telmisartan pawh an tel.

Heng damdawite hi company hrang hrang siam niin, a siamtu zingah hian Hetero Drugs, Alkem Laboratories, Hindustan Antibiotics Limited (HAL), Karnataka Antibiotics & Pharmaceuticals Ltd, Pure & Cure Healthcare, leh Meg Lifesciences pawh an tel a ni.

Pum lam damdawi atana hman tlang lawn tak, HAL siam Metronidazole pawh quality test paltlang lo zingah hian a tel a; popular calcium and vitamin D3 supplement lar tak Shelcal pawh NSQ Alert category-ah a tel bawk. Kolkata Drug testing lab-ah antibiotic, Clavam 625 leh Pan-D te chuan tehna te an paltlanglo a, naupang lam damdawi atana hman Cepodem XP 50 Dry suspenson pawhin CSDSCO hnuaia enchhinna neih hi a paltlang zo lo bawk.

Central drug regulator chuan list pahnih ti chhuakin pakhatah hian damdawi 48 lai ṭhatlam tehna tlin pha lo awmin list dangah hian NSG Alert huanga dah damdawi panga an awm. Kumin August thla khan CSDSCO chuan damdawi 'fix-dose' 156 chuang chu "mihring tana hlauhawm" tiin ram pumah alo khap tawh bawk a ni.