Sorkarin Lebanon chhuahsan turin India mi awmte a chah

Sorkar laipui chuan Israel sipaiten Lebanon-ah beihpui an thlak dawn tih thawm a awm avangin, Lebanon-a India mi awmte chu inthiarfihlim thuai turin a hriattir nawn leh.

Beirut-a Indian embassy chuan ngenna hi ti chhuak nawn lehin, Lebanon-a zin lo turin India mite a chah bawk. Buaina chuan sosan lam a pan zel tih a tarlang a ni.

Isarel sipai hotu, Herzi Halevi-a'n Lebanon-a Hezbollah hmunte tih chhiat sak tura beihpui an thlak chhunzawm zel tur thu leh, khawmual aṭanga beihna pawh kalpui tura a inbuatsaih thu a sawi chhuah hnuah Indian embassy hian he thurawn hi a rawn tichhuak leh a ni.

Embassy hian Israel leh Hezbollah inkar boruak ṭhat loh avangin India mi awmte chu fimkhur a, a theih anga Lebanon aṭanga inthiarfihlim turin a lo chah tawh bawk.

Beirut-a Indian embassy website in a tarlan danin, Lebanon-ah hian India khua leh tui 4,000 dawn an awm a, heng zinga a tam zawk hi company-a hnathawk leh construction sector leh agriculture farm a thawk te an ni.