India ramah unemployment rate la ziaawm lo

Covid -19 hri lengin kum 2020-2021 chhoa nasa taka ram dinhmun a sawi danglam chungin, India ram economy chu 6% chuangin a ṭhang chho reng thung.

India chu khawvelah economy lian ber ram panga na a ni tawh a, GDP pawh 2024-ah chuan USD trillion 3.94 a kai pha a ni. International Monetary Fund (IMF) in a chhut danin, kum 2025 kumtawpah chuan India hian Japan lehpelin, economy ram lian palina a ni thei dawn a, kum hnih hnuah Germany pelin economy lian ram pathumna a ni pha bawk ang.

Ram economy in chak taka hma a sawn mek chungin India rama ṭhalai, lehkhathiam hna nei lo, unemployment rate erawhin tlakhniam lam a la pan lo. Hei hian Indian economy leh labour market in mil lohna a ti lang chiang hle ni a ngaih a ni.

Labour Bureau-in July 2023 aṭanga June 2024 chhunga zirchianna a neih, Periodic Labour Force Survey(PLFS) chuan India unemployment rate chu kum 2023-24 ah 3.2% a la ni reng a, kum nga chhungin a la tlahniam lo. Total youth unemployment rate chu 10.2% niin, hmeichhiaah 11% leh mipaah 9.8% a ni a, hmeichhia hna thawh nei lo hi kum hmasaa 2.9% chu kuminah 3.9% in a pung bawk.

State leh UT zinga ṭhalai hna nei lo tamna, unemployment rate sanna ber chu Lakshadweep niin, unemployment rate hi kum15 - 29 inkar zingah 36.2% a nia, a dawtah Andaman and Nicobar Island awm in 33.6% a ni bawk. India state zinga ziak leh chhiar thiam tam berna, Kerala-ah ṭhalai 29.9% lai chu hna nei lo an ni a heng zingah hian hmeichhia 47.1% niin mipa hi 19.3% an awm bawk a ni. Zirchianna aṭang hian state leh UT 24-ah July 2023 - June 2024 chhunga unemployment rate hi double digit vek an ni.