AAP rally-ah loneitu pakhat intihhlum a tum

Sorkar laipuiin Land Bill siam danglam a tumna duh lohna lantirin nimin khan Delhi-a Jantar Mantar-ah Aam Aadmi Party (AAP) chuan rally a huaihawt a, rally neih lai hian loneitu pakhat chu thingkungah inawhhlum a tum a, mahse AAP volunteer-te'n an lo dang hman a ni.

Loneitu intihhlum tum hi Dousa, Rajasthan aṭanga kal a ni a, AAP volunteer-te'n an chhan hnu hian damdawi-inah hruai nghal a ni. Delhi Deputy Chief Minister Manish Sisodia chuan, "A dinhmun chiang tak kan hre lo a, Delhi sorkar chuan a chhungte kan khawngaih hle a ni. Chief Minister Arvind Kejriwal nen pawh damdawi-ina kalin kan va hmu thuai ang," a ti.

Delhi Chief Minister Arvind Kejirwal-a kaihhruaiin AAP hian rally hi a huaihawt a ni. Delhi Police-te'n rally huaihawt phalna hi pe duh lo mah se, AAP worker-te hian Jantar Mantar aṭanga Parliament building bul thleng kawngzawh hi kaltlangpui an tum a, hei vang hian Parliament bul velah venhim hna thawktu pawh eng emaw zat dah belh an ni.

AAP senior leader Sanjay Singh chuan, "BJP Land Ordinance hi dan hlauhawm, 'black law' a ni a, kan dodal zel ang. Bill-a section ṭhenkhat thlak ringawt hi awmzia a awm lo. A hma zawngin loneitute ram laksak a nih dawnin loneitute zinga 80% remtihna lak a ngai a, hei hi NDA hian a thlak danglam a ni. Dan hmasaah khan thlai chinna ram ṭhate chu laksak theih loh tih a nih laiin hei pawh hi an siam danglam a ni," a ti.

Loneitute tan an ding zel dawn tih sawiin, AAP hruaitu dang Kumar Vishwas chuan, "Sorkar hian loneitute ṭan zawngin eng thil mah a ti lo a ni. Prime Minister chu inrawlh a, loneitute hamṭhatna tur siamsak turin kan duh a ni. He thil hi politics zawnga kalpui kan duh lo a, loneitute tan kan ding zel dawn a ni," tiin a sawi.