Pakistan commando-te'n Lakhvi an veng

26/11-a Pakistan firfiakte'n Mumbai khawpui an beih ṭuma ruahmantu bera puh, Laskhar-e-Toiba hotu, Zaki-ur-Rehman Lakhvi chu Lahore bula a inah khawsain, Pakistan Army te'n an venghim tlat nia sawi a ni.

Lakhvi hi April 10 khan Court chuan Rawalpindi-a Adiala Jail aṭang­in a chhuah a, hemi hnu hian sipaite'n venhimna an pe zui nghal a ni. Lakhvi vengtu, commando-te hian sipai thuam inbel loin, thawmhnaw pangngai an ha niin intelligence report chuan a tarlang.

Kum 55 mi, Lakhvi hian kum 2008, November 26-a LeT firfiak 10-te'n Mumbai khawpui an beih ṭum khan Pakistan-a control room aṭangin pawikhawihtute hi a lo kaihruai a ni. LeT dintu leh JuD hotu, Hafiz Saeed nena inlaichin hnai tak, Lakhvi hi kum 2008 December thla khan man a ni a, a thubuai hi 2009 aṭang khan ngaihtuah chhunzawm lohin dah a ni.