Railways-a report dik lo CBI-in chhuichiang dawn

Central Bureau of Investigtion (CBI) chuan Indian Railways hnuaia bungraw phur kualnaa report dik lo a awm ṭhin nia sawi chu chhui chiang turin thubuai a ziaklut thuai dawn.

Bungraw phur rela bungrua phur zatte dik loa report a nih ṭhin avangin sorkar chuan sum tam tak a hloh phah a, hetianga dik lo taka thiltihnaah hian railways official eng emaw zat an inhnamhnawih nia rin a ni bawk.

Indian Railways vigilance wing leh CBI hian tun hnaiah ramchhunga rel station 65-te chu sawi lawk loin an endik thut a, hetah hian bungraw phurh zat chhinchhiana software-te chu khawih chingpen thin a ni tih an hmuchhuak. Software leh hardware-te khawih chingpen an nih bakah hian, log book pawh an khawih danglam ṭhin tih an hmuchhuak bawk.

CBI official chuan, "Kum 2012-13 a bungraw phurh zat siam danglamna hi 5% lek pawh ni se, hemi avanga sorkarin sum a hloh zat hi cheng vaibelchhe 4,263 a tling pha dawn a ni. Hetianga bung­raw phurh zat an khawih danglam hian rel-te chu an phurh tura bituk chin bak phurhtir an nih phah thei a, hei hian relkawng leh a rel himna thlengin a nghawng thei a ni," a ti.

Kum 2012-13 khan Indian Railways hian bung­rua metric ton maktaduai 1,008 a phur a, heta ṭanga a sum hmuh hi cheng vaibelchhe 85,262 a ni. Relin bungrua a phurte tehna, static leh in-motion weigh bridge hi hmun 200 velah siam a ni.