Rahul Gandhi-a'n Net neutrality chungchang sawi ho a phût

Tunlaia ramchhunga buaipui hlawh tak, internet service provider-te'n internet-a data zawng zawng angkhata an kal­pui­na tur, net neutrality chungchang chu nimina Lok Sabha inkhawmah Congress vice president, Rahul Gandhi chuan a sawichhuak a, Question Hour aiah hemi chung­chang sawi ho zawk tura adjournment motion siam turin a phût.

Thawhlehni khan Lok Sabha-ah vek hian net neutrality chungchang hi eptute chuan an lo sawi­chhuak tawh bawk. CPI(M) member, MB Rajesh chuan Zero Hour-ah sawichhuakin, telecom leh internet service provider-te'n net neutrality an palzutna chu awmze neiloin TRAI consultation paper chuan a thlawp a ni, a ti. Eptu member dangte pawhin sawi ho an duh thu an tarlang bawk.

Telecom Minister Ravi Shankar Prasad chuan Prime Minister Narendra Modi kaihhruai sorkar chuan net neutrality chung­chang hi a dah pawimawh hle tih a sawi a, TRAI rawtna siam pawh Telecom Commission chuan enfiahin, thutlukna a siam dawn a ni, a ti.