RG Kar doctor-ten nawrh chhunzawmah vau

West Bengal doctor te chuan ni 42 zet hna thawk loa RG Kar-a pawngsual leh tual thahna thlenga lungawi lohna an lan tir hnuah an hna an zawm leh tawh a, mahse an thil ngente tih hlawhtlin a ala awm loh avangin nimin, September 27 khan nawrh chhunzawmah thuneitute an vau.

Doctor-te hian chief secretary Manoj Pant hnenah email thawnin, September 18 a an meeting naa an thil ngente chu tun thlenga tih hlawhtlin ala nih loh thu an hriattir. West Bengal Junior Doctors’ Forum (WBJDF) hminga thu an thawnah hian, "Inbiaknaa inremna kan lo neih tawhte ah engmah tih hlawhtlinna a la awm lo tih hi tarlan kan duh a ni," tiin an tarlang.

An thu thawnah hian central inquiry committee din tura an phut chungchang an sawi nawn leh a, state puma medical college-ah hei hi din ngei a ṭul thu an sawi a ni. WBJDF chuan West Bengal Medical Council (WBMC) leh West Bengal Health Recruitment Board (WBHRB) member, nungphung ti derthawng thei chi boruak siam ṭhinte chhui chiang tura state sorkar hnena inquiry committee din tura an phut thu pawh Pant hi an hrilh nawn leh bawk. An thil sawi hi ni sarih hma ngeia tipuitling turin an phut a ni.