Modi-a'n 'Mann Ki Baat' hmang leh

Prime minister Narendra Modi chuan nimin, September 29, 2024 khan thla tin Pathianni hnuhnung bera radio programme a hman ṭhin, Mann Ki baat chu a hmang leh. Nimin kha he programme in kum 10 a tlinna a ni.

Prime Minister chuan 'Mann Ki Baat' chuan mipuiah a ṭha zawngin nghawng a nei a, chona thar leh chanchin mi tiphur thei a keng tel a ni, a ti. He programme hi platform dangdai tak, India miten chakna leh theihna pholanna ṭha tak a ni tiin, mipui te hnena a thuchah an pek chhuah ṭhin avangin media chungah lawmthu a sawi bawk.

Modi chuan mipui te hian thil thar lam leh ṭha lo lam chauha rilru an pe bik lo a, 'Mann Ki Baat' kal tlang hian mipui te chuan thil ṭha lam pawh an ngaihven tih a chiang tih sawiin,"Mipui te chuan thil ṭha lam, entirna ṭha tak pe thei leh chanchin mi tiphur thei te an ngaihven a ni" a ti.

Sorkar hmalakna pakhat, 'Make in India' chuan thil thawn chhuah lamah nasa takin economy a ti chak a, he 'Make in India' programme hian kum 10 hmel hmu tawhin, thil siam chhuah hrang hrang thawnchhuahna a nasa taka hmasawnin tualchhung thil siamchhuah kawngah a pui nasa hle tih a sawi. Mipui chu 'Make in India' siam chhuah lei uar turin a chah bawk.

PM chuan tun hnaia US a tlawhnaah hmanlai India thil 300 dawn chu a hawn kir thu a tarlang a, sorkarna an chan chhung kum 10 hian ram hrang hrang aṭanga hmasang thil lak bo tam tak lakkir a nih thu a tarlang. Faina beihpui thlakna, 'Swachh Bharat' hlawhtlinna hrang hrangte sawilangin, hei hi faina ngaih pawimawhtu Mahatma Gandhi chawimawina a ni, a ti. Kumin October 2-ah Swachh Bharat Mission hian kum 10 a tling tawh dawn tih a sawi bawk a ni.