Alam-a lakah Public Safety Act lekkawh

Jammu and Kashmir-a inlakhran duhtupawl hotu, Masarat Alam-a lakah nimin khan Public Safety Act lekkawh a ni.

Masarat Alam hi kar hmasa khana inlakhran duhtu, Hurriyat hotu Syed Ali Geelani lawmna atana rally a huaihawtah Pakistan hnam puanzar vai a, India dodalna thu a sawi avangin April 17 khan man a ni.

Alam-a lakah hian PSA lekkawh a nih avang hian a tlem berah kum hnih tal lung-in tantir tur a ni. Hei bakah hian Ranbir Penal Code (RPC) section 121-A (waging war against the country), 124 ( Sedition), 120-B (Criminal Conspiracy) 147 (rioting) hnuaiah thubuai siamsak a ni bawk.

Alam-a ukil chuan nimin khan central Badgam district-a chief judicial magistrate (CJM) court-ah bail dilna a thehlut a, vawiin hian court in a ngaihtuah ang.

Masarat Alam hi kum 2010-a Kashmir Valley-a India dodalna lantirna huaihawt a, buaina a chhuah avangin man a ni a, mahse March 7 khan J&K-a PDP-BJP ṭangrual sorkar chuan Alam hi jail aṭangin a chhuah a, hei hi eptu hrang hrang bakah BJP ngei pawhin nasa takin an sawisel a ni. Kum 2010-a nawrh a huaihawtnaah hian security force leh nawrh huaihawtte inkara buaina chhuak vangin mi 110 in an thih phah a ni.