Rally tihtawp loh vangin Kejriwal-a'n thupha chawi

Aam Aadmi Party (AAP) hotu leh Delhi Chief Minister, Arvind Kejriwal-a chuan Nilainia Jantar Mantar-a rally an neihna hmuna loneitu pakhat a inawhhlum hnua rally an titawp nghal mai lo chu an tihsual a ni tiin, thupha a chawi.

Hemi rual hian Kejriwal chuan media leh eptu pawlte'n loneitu, Gajendra Singh intihhlumna chhan ber, a harsatna neih chung­chang aia thil dang an buaipui zawk chu a sawisel nghal bawk.

Jantar Mantar-a AAP-te'n NDA sorkarin loneitute duhsak lo zawnga land bill siam danglam a tumna duh lohna lantira rally an huaihawt ṭum hian, an rally neihna bula neem kungah Rajasthan aṭanga kal, loneitu chu a inawkhlum a ni. Thingkunga a inkhai hi an hmuh veleh AAP activist-te'n la thlain, damdawi-in panpui mah se chhan hman a ni lo.

Kejriwal chuan, "Darkar khat vel thu sawi tur ka ni a, mahse minute 15-ah ka kaitawi ta a ni. Mahse kha kha ka tihsual niin ka hria. Thu kha lo sawi lo mai ila tha tur a ni. Ka thiam loh a ni a, rally kha lo tihtawp nghal tur a ni," a ti. Hemi rual hian loneitute intihhlum thlen ṭhinna chhan tak hriatchian tum aia, vanduaina thleng chu inpuhtawn leh inbeihna atana party dangte leh media te'n an lo hmang chu pawi a tih thu a sawi.

Gajendra Singh thih dan chhuinaah Delhi sorkar leh Delhi police-te inkarah harsatna a awm nia sawi chu chhangin, Kejriwal chuan a ṭul a nih chuan police-te hnenah statement pe tura a inpeih thu a sawi. "CrPC hnuaiah he thil thleng chhui tur hian District Magistrate chuan dikna a nei a, police-te chuan FIR tlawh­chhanin criminal investigation an ti thei bawk a ni. Police-te'n min ko a nih chuan statement pawh ka pe mai ang," a ti.

Hetihlai hian Delhi District Magistrate chuan Delhi Police-te chu Singh intihhlum dan chung­changa chanchin kimchang an hriat chu thehlut turin chawhma dar 11 thleng hun a pe. Delhi Police-te hian a hmain Delhi sorkarin magisterial probe zawm ve tura thu a pekna chu an lo hnawlsak tawh a ni.

Mahse Delhi Police-te hian District Magistrate hnenah hian loneitu intihhlum kaihhnawiha information leh evidence an neih­te chu an thehlut duh lo a, Delhi Police thupuangtu Rajan Bhagat chuan Delhi police-te hian CrPC Act leh Delhi Police Act hnuaiah chhui turin thuneihna an nei a ni, a ti.

Ningani khan Lok Sabha rorel inkhawmah loneitu intihhlum chungchang hi sawichhuah a ni tawh bawk.