Bihar-a thlipui tlehah mi 55 an thi

Bihar state-a district 12-ah Ningani khan thlipui a tleh a, thlipui tleh kaih­hnawiha chhiatna thlengah mi 55 in an thi a, mi 80 chuangin hliam an tuar.

Union Home Minister Rajnath Singh chuan thlipui tlehna hmun ṭhenkhatte hi tlawh a tum a, Chief Minister Nitish Kumar-a'n a ṭawiawm ang.

State disaster managment in report a siamah, thlipui tleh vang han Purnia district-ah thi an tam ber a, mi 32 an thi a, Madhepura-ah mi 7, Madhubani-ah 3, Katihar-ah 2, Sitamarhi-ah 2, Darbhanga leh Supual-ah pakhat ve ve an awm niin a sawi. Hliam tuar 80 chuangte chu sorkar damdawi-in hrang hrangah enkawl an ni bawk.

CM Nitish Kumar chuan thlipui tlehna hmun­te hi thlawhtheihnain a enkual tawh a, a office-ah official-te meeting a neihpui tawh bawk. CM chuan thlipui tleh tur hriatlawk­na engmah a awm lo a, hei vang hian state sorkar pawh a inpuahchak lawk lo a, chhiatna a thlen nasat phah niin a sawi.

CM hian PM Narendra Modi pawh a be tawh a, sorkar laipui pawhin a ṭul anga puih a inhuam thu a hrilh. Governor Keshari Nath Tripathi chuan state sorkar hnenah thlipui tleh vanga thi chhungte hnenah cheng nuai 4 ṭheuh pe tur leh, thlipui tuarte chhawmdawlna hna pawh rang taka kalpui nghal turin a ngen.