Ni 5 chhung Al Jazeera tichhuak dawn lo

International news channel, Al Jazeera chu an channel-ah India map dik loa a tihchhuah ṭhin avang­in sorkar laipui chuan a hremna atan ni nga chhung India ramah tihchhuah a khap.

Nilaini aṭang khan Al-Jazeera new channel-ah hian blank screen chauh a lang a, April 27, zan dar 12 thlengin he channel hi en theih a ni dawn lo tih Ministry of Information and Broadcasting chuan a tarlang.

I&B ministry hian kum 2013 leh 2014 khan Al-Jazeera hian India ram map dik lo chu a ti lang tawh ṭhin a, hemi chungchang hi Surveyor General of India (SGI) hnenah pawh hriattir a ni tawh tih a sawi.

SGI-in a enfiahnaah, Al Jazeera hian India rama Jammu and Kashmir state chhunga hmun ṭhenkhat chu India ramah a dah lo niin a sawi. Hei bakah hian Lakshadweep and Andaman Islands pawh map ṭhenkhat­ah a tilang tel lo bawk.

SGI chuan news channel-in map a hmante chu Survey of India copyright map nen a inmil lo a, National Map policy, 2005 leh Ministry of Defence-in map restriction policy a tihchhuah nen a inkalh bawk a ni, a ti.