Nepal atangin India mi 500 hruai haw an ni tawh

Lirnghing na takin a sawi, Nepal ram aṭangin India mi 500 chuang chu Air Force thlawhtheihna hmangin hruai haw an ni tawh. Nimin khan Kathmandu-ah India mite hruai turin thlawhtheihna 10 kal tura ruahman leh a ni.

Kar kalta Inrinnia Nepal rama magnitude 7.9-a naa lirnghing khan India ram hmar leh khawchhak lam pawh a sawi tel a, Bihar, Uttar Pradesh leh West Bengal-te chu a tuar nasa state niin, lirnghing vang chhiatna thlengah mi 53 an thi a, midang 237 in hliam an tuar.

Union Home Ministry chuan thi zinga 32 hi Bihar state ami an ni tih sawiin, Uttar Pradesh-ah 10 leh West Bengal-ah mi 2 an thi bawk. Prime Minister Narendra Modi chuan UP CM Akhilesh Yadav, Bihar CM Nitish Kumar, West Bengal CM Mamata Banerjee, Sikkim CM Pawan Kumar Chamling leh Madhya Pradesh CM Shivraj Singh Chouhan-te biain, lirnghingin an state-a khawih dante a sawipui a, a ṭul angin sorkar laipuiin a puih zel tur thu a hrilh.

Sorkar laipui chuan lirnghing vang­a thi chhungte chu ralna, cheng nuai hnih ṭheuh pek an nih tur thu a puang.

Home Secretary LC Goyal chuan National Disaster Response Force (NDRF) team panga, member 45 zel awmna te chu Bihar leh Uttar Pradesh-ah chhawmdawl leh chhanchhuah hna thawk tura tirh an nih thu a sawi. Nepal ramah nimin thleng khan aftershock a la awm avangin vawiin leh naktuk hian Bihar-a school te chu khar vek an la ni rih ang.

Home Minister Rajnath Singh chuan Bihar-a lirnghingin thil a tihchhiat dante chu Bihar Chief Minister Nitish Kumar nen Air Force chopper hmangin an enfiah. Home Minister Singh chuan Bihar CM chu an state-in chhiatna a tawha rang taka hma a lak nghal danah a fak thu a sawi.

Nepal ramah hian India under-14 girls football team an awm mek a, heng mite hruaichhuaktu tur hian ṭanpuitu tirh thuai tum a ni bawk. Inrinni zan khan football team member 18-te hi Kathmandu-a an thlenna hotel chhungah pawh riak ngam loin, kawtthlerah an riak a ni.

PM Modi chuan nimin zinga radio-a a hun hman, 'Mann ki Baat' ah Nepal rama chhiatna thleng chung­chang hi a sawichuak a, Nepal-in chhiatna rapthlak tak a tawrh chu India-in a tawrhpui thu a sawi a, "India chuan Nepal mite mittui chu a hruk hul sak ang, an kut vuanin a pui zel dawn a ni," a ti. Modi hian Nepal President leh Prime Minister-te pawh a be tawh bawk.

Rajnath Singh chuan Nepal rama lirnghing tuarte chhanchhuah leh chhawmdawl hna thawk turin NDRF team chu Inrinni khan tirh an ni tawh a, nimin khan team paruk tirh belh leh an ni tih a sawi. Nepal rama khualzin tangkhang mekte chu a thlawna visa pe turin Bureau of Immigration pawh hriattir a ni tih a sawi bawk.

India ram aṭangin Maharashtra state mi leh sa, khualzin leh tlang lawn mi 800-1,000 vel chu Nepal ramah hian an la tang mek a, mahse heng mite hi an him niin official-te chuan an sawi.

Indian Railways chuan special Indian Air Force aircraft hmangin tui thianghlim, 'Rail Neer' tui bottle 100,000 chu Inrinni zan khan a thawn lut a, nitin tui thianghlim hi bottle 100,000 thawn luh tum a nih thu Railways Minister Suresh Prabhu chuan a sawi. Rail Neer hi Indian Railway Catering leh Tourism Corporation Ltd-te siam a ni.