Gajendra chhungte'n AAP hotu thupha chawi an pawm lo

Kar kalta Nilainia Aam Aadmi Party (AAP) in Delhi-a rally an huaihawtnaa inawkhlum, Gajendra Singh chhungte chuan AAP hotu, Arvind Kejriwal-a thupha chawi chu an pawm lo tih an sawi.

AAP hian BJP kaihhruai NDA sorkarin Land Bill siam danglam a tumna duh lohna lantira Jantar Mantar-ah rally an huaihawt a, rally neih lai vek hian an pungkhawmna bula neem kungah Rajasthan aṭanga kal, Gajendra Singh hi a inawkhlum a ni.

AAP worker-te'n thingkunga Gajendra Singh inkhai hi la thlain damdawi-in an panpui nghal a, AAP hotu chuan inkhawm chu titawp loin thu a sawi chhunzawm a ni. A hnuah Kejriwal-a hian thupha chawiin, rally an neihna hmuna intihlum an awm chunga inkhawm titawp lo a, thu a sawi chhunzawm chu a tihsual a nih thu leh, thupha a chawi thu a sawi.

Mahse Gajendra chhungte chuan Kerjiwal thupha chawi hi an pawm lo tih sawiin, a thih dan chu CBI chhuitir an phut a ni.

AAP rally neihna hmuna loneitu intihhlumna thleng vang hian party leh pawl hrang hrangte chuan inbeihna remchangah an hmang a, a thih dan chhuinaah pawh Delhi Police leh Delhi sorkar inkarah harsatna a awm mek bawk.

Delhi-a AAP sorkar chuan Gajendra Singh-a chhungte hi hna pek a tiam a, martar status pek a tum bakah, a hming chawi hian Delhi sorkar hnuaiah loneitute pualin compensation scheme siam a tum bawk. AAP hruaitu Sanjay Singh chuan Gajendra Singh chhungte hi an khua, Rajasthan-a Dausa district-a a hmuh hnuin, Delhi sorkar hmalak tumna hi an party hruaitute inhmuhkhawmnaah a puang a ni. AAP hian Singh chhungte hnenah hian cheng nuai 10 a lo pe tawh bawk a ni.