Delhi CM hoin kawngpui khuarte endik; Diwali hmain siamṭhat vek hman tum

Delhi chief minister thar Atishi hoin nimin khan Delhi khawpuia kawngpui khuar awmte endik a ni a, Diwali hma ngeiin khawpui kawngpui chu khuar awm lohna, 'pothole free' a siam a tum thu a sawi.

Kawngpui endiknaah hian Chief Minister hi PWD engineer-ten an zui a ni. Atishi chuan kawngpui khuar awm chuan mipuite tan harsatna nasa tak a siam a ni tih sawiin, a buaipuitu official-te chu kawngpui siamṭhat hna thawk ṭan nghal turin a hrilh. "Arvind Kejriwal a kaihhruaina hnuaia Delhi khawpui chhunga kawng khuar zawng zawng chu Diwali hmaa thawmṭhat tum a ni," tiin endikna an neih zawhah Atishi chuan a sawi a ni.

Minister Saurabh Bharadwaj leh deputy CM hlui Manish Sisodia te chuan Delhi khawchhak lam kawngte an endik ve bawk. Sisodia chuan X-ah post zuiin, BJP chuan amah leh CM hlui Arvind Kejriwal-te chu an mantir avangin AAP sorkarin Delhi mipuite tan hna thawh hrang hrangte pawh a bahhlah phah nasa a, kawngpuite pawh a lo chhiat phah a ni, a ti.

CM Atishi hian Pathianni khan Delhi kawngpui dinhmunte zirchiagin meeting turin a lo ko tawh a, minister zawng zawngte chuan kar khat chhung chan neiin kawngpuite an endik vek ang a, siamṭhat ngaite an chhinchhiah dawn tih a sawi. Minister-ten an enfiah hnuah kawngpui thawm ṭhat hna hi ṭan nghalin, October thla tawpah chuan kawngpui khuarte chu thawm ṭhat vek hman an tum thu a sawi a ni.