Congress-in Nirmala Sitharaman bang turin phut

Congress party chuan Pathianni khan union finance minister Nirmala Sitharaman chu electoral band scheme tihtawp tawh kaihhnawiha thubuai siamsak a nih hnuah minister a nihna aṭanga bang turin an phut.

Karnataka special court thurawn angin, Sitharaman leh mi dangte lakah electoral bonds scheme hmang suala puh chungchangah thubuai hi ziah luh a ni.

Congress hruaitu hlun, Abhishek Manu Singhvi leh party general secretary (communications) Jairam Ramesh te'n thuthar lakhawm tute an kawmnaah, electoral bond scheme chungchangah hian chhui chiang turin Special Investigation Team (SIT) din an phut thu an sawi bawk.

Karanataka minister Priyanka Kharge chuan Union Finance Minister leh BJP hruaitu dang te chu bang turin a phut ve bawk. Singhvi leh Ramesh chuan scheme sumte hi kawng li hmangin tihchingpen ani tiin chungte chu "pre-paid bribery," "post-paid bribery," "post raid bribery," leh "shell companies," kaltlangte a ni, a ti. Ramesh hian Finance Minister chu pawikhawihnaah hian kawng hrang hranga thiam lohna a neih avangin bang ngei turin a phut thu a sawi.

Singhvi pawhin hmingdang tarlang lem lo mahse he thil thlengah hian Finance Minister chuan amah chauha a tih a rin loh thu leh ti tura thupek petu an awm a ni tiin, "he thil hi tu tih nge tih leh tu ruahman nge tih kan hria" a ti.

Bengaluru special court chuan Janadhikaara Sangharsha Parishath co-president, Adarsh R. Iyer, Adarsh R. Iyer complaint thehluh benchhanin, Inrinni liam ta khan Sitharaman leh mi dangte lakah electoral bons sum, Rs vbc 8,000 tih chingpen nia sawi kaihhnawihah thubuai ziak lut turin a lo hriattir tawh a ni.