UP-ah Rs 15 vangin Dalit nupa that

Uttar Pradesh-a Mainpuri district-a Lakhmipur khuaah dawrkari pakhat chuan Dalit nupa chu an leiba, cheng 15 an pek theih loh avangin a chek hlum. Tualthattu hi man nghal a ni.

Dawrkai hi kum 60 chuang tawh, Ashok Mishra niin upper caste a ni. Ningani khan a pawisa, Rs 15 batu, hnam hnuaihnung Dalit nupa, Bharat Nat (45) leh Mamta (40) te hi an ba pe turin a ti a ni. Nat-te nupa hi nitina inhlawhfa ṭhin niin, Mishra dawr aṭang hian an mamawhte an lei ṭhin. Mishra hian an leiba an pek theih loh avangin Nat-te nupa hi hreiin a chekhlum ta a ni. Nat-te nupa hian fa panga an nei a, an fate hi an ṭhenawmte kutah dah hrih an nih thu official-te chuan an sawi.

Police-te chuan Mishra hi man nghal in SC/ST Act hnuaiah thubuai an siamsak.

Uttar Pradesh-a rorellai, Samajwadi Party chuan tualthahna rapthlak tak thleng chu an dem thu sawiin, state sorkar chuan mitthi chhungten rorelna dik tak an hmuh theih nan rang takin hma a la dawn a ni, a ti. SP hruaitu Guarak Bhati chuan he thil thleng hi politics lama inbeihna tana hmang lo turin, a bikin BSP hruaitute a ngen nghal bawk.

Tun hnaiah ramchhung hmun hrang hrangah Dalit-ten beih an tawk fo a, Dalit hotu leh BSP hruaitu Mayawati chuan Dalit mite beihna hluar chungchangah centre-a rorellai, BJP chu na takin a sawisel tawh a ni.

Dalit mite beihna hi BJP rorelna state-ah a thleng tam zual niin National Commission for Scheduled Caste report tihchhuah hnuhnung chuan a tarlang. National Crime Records Bureau data tihchhuah chuan ram chhunga hnam hnuaihnung zawkte beihna a hluar niin a tarlang bawk. Khawthlang lam state zingah pawikhawihna thleng 60% ah a tuartu chu Dalit hnam an ni.

Nimina Rajya Sabha rorel inkhawmah eptu member-te chuan Dalit leh Muslim mite beihna hluar chungchangah BJP chu na takin an bei let. Zero Hour-ah Congress hruaitu Mallikarjun Kharge chuan Gujarat leh UP-a Dalit mite beih an nih dan a sawichhuak a, hei bakah hian bawng humhalhtu pawl intite khapna siam a phut bawk. Kharge chuan bawng humhalhtu intite hian mahnia dan insiam chawpin an duh angin an che a, BJP sorkar chuan an duh anga che tur hian a chawk phur bawk a ni, a ti. Bawng humhalh chhuanlama pawikhawihna thlengah RSS leh BJP member te pawh an inhnamhnawih fo niin a sawi bawk.