Tuihnuaiah AN-32 bo an zawng dawn

India Air Force thlawhtheihna, AN-32 chu chin hriat loha a awm aṭangin ni ruk chhung ngawrh taka zawn a nih hnuah pawh a chanchin engmah hriat a la ni lo a, tuihnuai lamah zawn chhunzawm tum a ni.

Official-te chuan boruak lam aṭanga zawn hna chu thawh reng la ni dawn mah se, tuihnuai lamah zawn hna hi ngawrh zawka kalpui ni dawn tih an sawi a, hemi atan hian hmanraw ṭha bikte hman belh tum a ni.

Defence Minister Maohar Parrikar chuan Lok Sabha inkhawmah thlawhtheihna bo dan hi hriat chian a la ni thei lo tih a sawi a, tuichung leh tui chhung lamah te zawn mek a ni, a ti. Tui hnuai lama zawn hna thawhna atan hian Navy submarine bakah tuihnuai lama hman chi hmanraw dang eng emaw zat hman a ni a, km 3-3.5 biala zauah zawn a ni.

Nilaini aṭang khan INS Nirupak pawhin underwater vehicle leh camera nen AN-32 bo zawn hna hi a thawk ve ṭan a ni. Hei bakah hian thlawhtheihna zawn nan hian Geological Survey of India hnenah Oceanographic research vessel, Samundra Ratnakar leh National Institute of Ocean Technology research vessel, Sagar Nidhi-te pawh dilin, tuipui mawng lam zawnna atan hman an ni ang.

IAF thlawhtheihna, AN-32 hi July 22 khan Chennai aṭanga Port Blair pana a thlawh laiin biak pawh theih lohin a awm a, tun thlengin a chin hi hriat a ni rih lo a ni. He thlawhtheihnaa hian mi 29 chuangin, an zinga paruk chu thlawhtheihnaa thawk an ni.