Nepal-a India mi awmte hruai haw chhunzawm zel

Nepal rama lirnghing tuartu, India mite hruai haw hna chu thawh chhunzawm zel a ni a, nimin thleng khan Air India thlawhtheihna hmangin mi 1,935 hruai haw an ni tawh a, thlawhtheihna dang pawh tirh leh tum a ni.

Defence Ministry thupuangtu, Sitanshu Kar chuan, "Khaw­chhe hnuaiah IAF hian hna an thawh chhunzawm zel a, thlawhtheihna 12 hmangin Kathmandu aṭangin mi 1,935 hruai haw an ni tawh a ni," a ti.

Nepal rama lirnghing tuarte chhanchhuah hna thawhnaa pui turin National Disaster Response Force (NDRF) member 1,000 dawn chu tirh an ni tawh bawk.

Air India chuan New Delhi, Kolkata leh Varanasi aṭanga Nepal khawpui, Kathmandu kalna man chu nimin aṭang khan Rs 14,000 aṭangin Rs 4,700-ah a tihniam. Hei bakah hian Kathmandu pan tur thlawhtheihna vawi eng emaw zat cancel a nih avangin nimin khan Kathmandu pan tur flight dang pali a thlawh belh tir bawk.

Pathianni khan Prime Minister Narendra Modi-a kaihhruaiin high level meeting neih a ni a, hetah hian lirnghing tuartu, Nepal ramah high-level team tirh an rel. Nimin vek khan Home, Defence, External Affairs leh NDMA senior official-te awmna team chuan Nepal hi an pan nghal a, chhanchhuah hna thawhna kawngah puih dan turte an enfiah ang.

Lirnghing tuarte ṭanpuina atan hian sorkar laipui chuan blanket ton 10, tui thianghlim ton 50, ei tur lam chi ton 22 leh damdawi ton 2 a thawn lut tawh a ni.

Nimina Rajya Sabha inkhawm­a Zero Hour hun tam zawk chu Nepal rama chhiatna thleng chungchang sawina atan hman a ni a, lirnghing vanga thi leh chhiatna thleng tuarte tuarpuina hun hman a nih bakah, member-te chuan sorkar laipui chu disaster management plan buatsaih turin an ngen.

Telecom and IT Minister Ravi Shankar Prasad chuan Nepal leh India ram hmun ṭhenkhatah lir­nghing thlen hnuah, social media hmangin mi tam takin lir a nghing leh dawn tia insawiṭhaihna thute an thehdarh thu sawiin, hetiang thu thang dik lo laka mipuite chiai lo turin a ngen nghal bawk. Sorkar chuan chhiatna thleng thei tur lakah a ṭul angin hma a la zel dawn a ni, a ti.

Inrinnia Nepal-a lirnghingin India hmarlam leh khawchhak lam a sawi avanga India rama chhiatna thlenga thi chu mi 62 an tling tawh a, heng zinga 50 chu Bihar state ami niin, hliam tuar mi 259 an awm bawk.