Chhungkaw tin in sak tumnaah thawhhona ṭha a ngai: Naidu
Union Housing and Poverty Alleviation Minister M Venkaiah Naidu chuan sorkar laipuiin kum 2022-a chhungkaw tin chenna in siamsak a tumna, 'Housing for All' chu a taka tihlawhtling turin public leh private sector-te thawh hona ṭha neih a ngai a ni, a ti.
Housing and Urban Development Corporation Ltd (HUDCO) din champha vawi 45 lawmna inkhawma thu a sawiah, Naidu chuan "State leh central sorkar chu an thawh ho a ngai a, hei bakah hian private sector pawh an tel a ngai a ni," tiin a sawi.
Urban housing mission, 'Housing for All' hi union cabinet chuan a pawm tawh a, he mission hnuaiah hian kum 2022-ah town leh city 4,041 ah chenna in vaibelchhe 2 sak hman tum a ni.
Minister chuan hmasawnna tur chuan ram a ngai a, ram chu airport, kawng, rel kawng siamna turin mamawh a ni, a ti. Hei bakah hian in sakna atan pawh ram mamawh a ni a, mahse ram lak chungchangah harsatna a awm ṭhin avangin project tam tak pawh a tang mek niin a sawi bawk.
Tunlai khawchin awm dan te, sik leh sa inthlak danglam thut thut avangtein loneih chu tunhma angin a hlawk thei lo niin minister chuan a sawi a, khawpuia pem lut an tam zel dawn a ni, a ti. "Khawpuiah chuan hna thawh tur remchang a tam zawk a, health leh education facility pawh thingtlang lam aiin a tam zawk a ni," a ti.
McKinsey Global Institute in tun hnaia report a tihchhuahah, kum 20 hnuah India chuan khawpui lian, mi maktaduai khat chuang chenna 68 a nei tawh dawn niin a tarlang. Tunah hian khawpui lian 42 a awm.