TRAI-in mail thawntu ID tlangzarh

Telecom Regulatory Authority of India (TRAI) in net neutrality chungchanga mail thawntute ID chu mipui hmuh theih turin a tlangzarh a, mail thawntu ID leh hmingte pholan vek a ni.

Thla khat liamtaah khan TRAI hian Over The Top (OTT) service- apps leh website chungchangah draft consultation paper siamin, a duh apiang tan an ngaihdan thehlut theihna hun a siam a ni. Chhanna hun a hawn chhung hian service provider hrang hrang aṭangin pawl bakah mimal aṭangin email maktaduai khat chuang a dawng hman.

Mail thawntute ID leh hming, mipui vantlang hmuh theiha tura tihchhuah hian sawizui a hlawh nghal hle a, TRAI hian chhanna a dawnte hi a tlangzarh ang tiin sawi lawk mah se, mimal email ID leh hmingte tarlan hi privacy palzutna angah ngaih a ni tho a ni. Email signature-a phone number leh address dah langte chu TRAI site-ah hmuh theiha pholan vek an ni dawn a ni. He thil thleng vang hian mail thawntu tam tak hian spam mail tam tak an dawn phah rin a ni.