‘Delhi Chalo Padyatra’ neitute Delhi ramri ah man: Police-ten an hren zingah activist Sonam Wangchuk a tel

Ladakh tana Sixth Schedule status phuta Delhi pana kawngzawh, 'Delhi Chalo Padyatra' neite chu Thawhṭanni, September 30 zan tlai tawh takah khan Delhi ramri, Singhu border-ah police-ten dangin an hreng. An zingah hian he kawngzawh kaihruaitu, climate activist Sonam Wangchumk pawh a tel.

'Delhi Chalo Padyatra' hi September 1-ah khan Leh aṭangin an ṭan a, October 2-ah Rajghat luh an tum a ni. He kawngzawh hi Leh Apex Body (LAB) leh Kargil Democratic Alliance (KDA) huaihawt a ni a, kum li chhung chu Ladakh hi state puitlinga hlan kai, Constitution Sixth Schedule hnuaia daha, Leh leh Kargil district tana Lok Sabha seat hran siamsakte an phut a ni.

Delhi khawpui luh tuma kawngzawh, Wangchuk leh mi dangte hi Delhi ramriah man an nih hnuin police station hrang hranga hruai an ni. Kawng zawhte hi khapna thupek palzutah puh an ni. Wangchuk leh mi dangte hian hren an nihna police station hrang hrangah chaw ngheiin lungawi lohna an lantir zui bawk.

KDA member Sajjad Kargili chuan Delhi Police-te chuan a tirah khawpui chhung kawngzawh huaihawt an tum chu an phalsak a, mahse Delhi ramri an thlen hnuah Thawhṭanni khan phalna an pek hi an sut leh niin a sawi. Dodalna nasa tak tam mah se, Ladakh tana state leh Sixth Schedule an phutna chu an chhunzawm zel dawn tih a sawi.

Kum 2019, August 5-a BJP kaihhruai sorkar laipui chuan Jammu and Kashmir tana special status pekna, Constitution-a Articlet 370 chu ti tawpin, J&K state nihna chu hlipin union territor pahnih - Jammu and Kashmir leh Ladakh-ah a ṭhen zui a ni. Ladakh hi Assembly nei loin a awm a, 2011 chhiarpuia tarlan danin a mi cheng hi nuai 2.74 an ni.

Delhi ramria Sonam Wangchuk leh mi dangte man an nih avang hian nimin khan Leh khawpuiah mi tam takin lungawi lohna a lantir. Delhi police-te chu an mi mante chhuah tur leh, kawng zawh an tum chu chhunzawm phalsak turin an phut tih an sawi.

Eptu party hrang hrang hruaitute pawhin 'Delhi Chalo Padyatra' Wangchuk leh mi dangte man an nih chungchangah BJP kaihhruai sorkar laipui chu na takin an sawisel.

Congress president Mallikarjun Kharge chuan Wangchuk man a ni chu democracy palzutna a ni tiin, dawihzep thlak a tih thu a sawi. Samajwadi Party hotu Akhilesh Yadav pawhin kawng zawhte man an nih avang hian BJP chuan eng hlawkna mah a tel phah dawn lo tiin a sawi bawk.

Aam Aadmi Party (AAP) hotu, Arvind Kejriwal chuan a X-ah Wangchuk-a video dahin, "A changin Delhi-a loneitute rawn lut tur an dang a, a changin Ladakh aṭanga rawn kalte an dang bawk a. Delhi hi mi pakhat ta chauh em ni? Delhi hi kan ram khawpui a ni a, mi tu pawhin he hmun rawn kal tur hian dikna an nei vek a ni." a ti.