Bengal doctor-ten nawrh huaihawt thar leh

West Bengal-a junior doctor-te chuan state hospital hrang hranga venhimna ṭha zawk phuta nawrh an huaihawt chu hun eng emaw chen an tawpsan hnuah, nimin chawhma dar 10 aṭang khan an thar thawh leh.

Doctor-te chuan an hnathawhna hmuna venhimna ṭha zawk ngaihtuah sak tura sorkar an phut chungchangah hmasawnna engmah hmuh a nih loh avangin, an hna thawh chawlin nawrh hi an huaihawt leh tih an sawi.

Bengal sorkar chuan doctor nuarte hi bepawpin, an thil phut zinga mi toilet siam leh CCTV dah tihte chu hun a la duh deuh dawn niin a sawi.

Kolkata-a RG Kar Medical College and Hospital-a doctor zirlai pawngsual leh thah a nih hnuah, doctor rualte hian he tualthahna thleng an duh lohna lantir leh, an hnathawhna hmun him zawka siam phutin an nuar a ni. Ni 42 chhung duty chawlhsana nawrh an huaihawt hnu leh, sorkar nena inbiakna an neih hnuah September 21 aṭang khan an hna hi an zawm leh a ni.

Doctor-te hian hna an zawm hnuah, sorkar enkawl Sagore Dutta Medical College and Hospital-ah damlo chhungten doctor leh thawktu dangte an beih avangin lungawi lohna hi an lantir leh ta a ni. Vawiin, October 2 hian Kolkata khawpuiah rally huaihawt an tum bawk.