BJP hruaituin mipuite bawng zun a intir

Madhya Pradesh-a Indore district-a Navratri festival hmannaah BJP hruaitu chuan festival hmang tura pandal chhunga lut turte chu bawng zun in tir zel turin a buatsaihtute a hrilh. He thil hian sawi zui a hlawh hle.

BJP district president Chintu Verma chuan he tihdan phung, "aachman" chu Sanatan hnamah chuan thil awmze nei leh nghawng lian tak nei a ni tiin a sawi. "Kut huaihawt tute "aachman" hmang tur hian kan ngen a, pandal lut turte chu bawng zun intir zel turin kan ngen a ni," a ti. 'Aachman' hi Hindu sakhua tihdan phungah chuan sakhaw hun pawimawh an hman dawnin intihthianghlimna atan thu an chham pual laiin tui an in ṭhin a ni.

Verma chuan bawng zun in tura an tihna chhan pawh sawifiahin, pawnlam mi ṭhenkhat chu an hun hmannaah hian an rawn tel ṭhin tih a sawi a, "Aadhar card pawh siam ṭhat theih a ni. Hindu a nih a, Garba Pandal an lut duh a nih chuan aachman atan bawng zun in chu tih hmasak ngai a nih angin zawhna zawt buai loin an ti mai a ni," a ti.

Madhya Pradesh Congress party thupuangtu, Neelabh Shukla chuan BJP hruaitute chu bawng enkawlna hmun siamnaa harsatna awm chungchangah an ngawi reng a, hetih lai hian bawng chu politics khelhna hmanrua atana hmang leh si ah a puh. "Bawng zun in a aachman hman hi BJP ten sakhaw intihbikna vawrh lar nana a in bumna thar an hman a ni," tiin a sawi.