Climate Activist Sonam Wangchuk chhuah a ni

Climate activist Sonam Wangchuk leh amah thlawptu, Ladakh aṭanga Delhi luh tumte chu Delhi police-ten an man a, darkar 36 chhung an hren hnuah Nilaini chawhnu khan chhuah zalen an ni. Wangchuk hi President emaw Prime Minister emaw meeting a neihpui theih tur pawh an tiam bawk.

Hren an nihna aṭanga chhuah an nih hnu hian Wangchuk leh mi dangte hi Rajghat-a Mahatma Gandhi zahna hlan turin an kal nghal a ni.

Delhi police-te chuan Thawhṭanni zan khan Wangchuk leh amah zuitu mi 150 vel, Ladakh aṭanga Delhi pana kawng zawh, 'Delhi Chalo Padyatra' neite chu Delhi ramri, Singhu border-ah an lo dang a, Delhi khawpui chhunga an luh remti loin an hreng zui a ni. Police-te chuan October 6 thleng Delhi border-ah hian Bharatiya Nagarik Suraksha Sanhita (BNSS) Section 163 puan a nih avangin, hemi tlawhchhan hian an lo hreng niin an sawi.

Sonam Wangchuk chuan, " Delhi kan thlenin harsatna kan tawk a, hren kan ni a, mahse engkim hi chhan neia thleng vek a ni. Environment venhim chungchanga kan thuchah ken ten mipui tam zawk a thlen avangin kan lawm zawk hle a ni. Sorkar hnenah memorandum te kan thehlut a, Ladakh venhimna tur atana danpui hnuaia dah turin kan ngen a ni," a ti.

Engvanga Wangchuk hi Delhi kal nge a nih

Wangchuk leh volunteer dangte hian Ladakh chungchanga an thil phutte nawr a, sorkar laipuia an thil phutte tihhlawhtlin nan leh, inbiakna an neih theih nan September 1 khan Leh aṭangin Delhi pan hian ke in an chhuak a ni.

Sorkar laka an thil phut zingah hian Ladakh chu India danpui hnuaia Sixth Schedule a dah te, tualchhung miten an ram leh an hnam nihnate an venhimna theihna atana dan leh hrai siamte a tel.

Hrenna aṭanga chhuah a nih hnua media te a kawmnaah, Wangchuk chuan," Ladakh chu India danpui hnuaiah Sixth Schedule-a dahin, tribal mi leh tualchhung mi te himna pek a, kan chhehvel enkawl leh kaihruai thei tura thuneihna min pe turin ka ngen a ni. Home minister in min tiam angin ni rei lote hnuah Prime Minister emaw President emaw Home Minister emaw chu inkawmna hun ka neihpui dawn a ni. Mipui rorelna tundin a nih leh theihna turin state nihna leh sixth Schedule hman chu ka ngenna a ni," tiin a sawi.