Delhi-ah cocain kg 500 man

Delhi Police-te chuan Nilaini khan cocaine Kg 500 chuang Rs vbc 2,000 hu chu Delhi-ah an man a, Delhi khawpuia ṭum khata ruihhlo man hnem ber a ni.

Police-te chuan Delhi chhim lama beihpui an thlaknaa ruihhlo tam tham tak an man kaihhnawihah hian mi pali an man tel bawk. Ruihhlo an manah hian khawvel huapa ruihhlo tawlhru pawl pawh an inhnamhnawih niin an sawi.

Pathianni khan Delhi-a Tilak Nagar area-ah Afghan mi pahnih kut aṭangin heroin gram 400 leh cocaine gram 160 an lo mansak tawh a, hemi ni vek hian Delhi Customs chuan Indira Gandhi International Airport-a khualzin pakhat hnen aṭangin cocain gram 1,660, Rs vbc 24 chuang hu an man bawk a ni.

Delhi Customs chuan thu an dawn bawhzuiin IGI Airport-ah cocaine hi man ani tih X-ah an sawi a, ruihhlo kawltu an man hi Dubai aṭanga rawn lut, Liberia ram mi a ni tih an sawi a, NDPS Act, 1985 hnuaiah hren a ni tih an sawi bawk.