PM Modi-a'n top-level security meeting a ko

Prime minister Narendra Modi chuan Asia khawthlang lama buaina punlun zel avangin nimin khan Cabinet Committee on Security urgent meeting a ko.

Committee-ah hian Prime Minister, Home Minister, Defence Minister, Foreign Minister, Finance Minister leh National Security Adviser-te an awm. Middle East-a buaina thleng mek te, Iran-in ballistic missile hmanga Israel a beih avanga buaina sosang zual chungchangte an sawi ho a ni.

Heng bakah insumdawn tawnna leh supply chain, a bikin oil, petroleum leh a kaihhnawih thilte an sawi ho bawk. India chuan buaina thleng mekah inhnamhnawih hrang hrangte chu an buaina chinfel dan chu inbiakna hmanga ngaihtuah thuai turin a ngen. Tuna buaina thleng mek chu ram dangahte a punlun zel loh a ṭul hle a ni, an ti bawk.

Middle East-a buaina thleng mek hian a intibuai ramte chauh ni lo, a chhehvel ramte bakah khawvel huap pawhin harsatna a thlen a ni. Iran leh Israel inkar boruak chhe zel chuan Red Sea leh Gulf of Aden kaltlanga insumdawn tawnna pawh a tihbuai nasat hle a rinawm bawk. Red Sea-a buaina hi nikum October aṭang khan thleng ṭanin, Iran thlawp Houthi helten helai biala khawvel huapa insumdawntawnna hi beiin anti buai a ni. He vang hian India in kumin August thlaa petroleum a thawn chhuah chu USD tld 5.96 ah a tlakhniam phah. Nikum August thlaa petroleum a thawnchhuah chu USD tld 9.54 a tling a ni.