PM Internship Scheme hawn a ni ta

Ram chhunga ṭhalai hna nei lote harsatna phuhrukna tura sorkar laipuiin a duan, Prime Minister Internship Scheme chu hawn a ni ta. He scheme hmang hian company lianah intern tih theih a ni dawn a, sorkar laipui chuan scheme pilot project atan hian Rs vbc 800 a dah dawn.

Ningani khan scheme pilot project hi hawn niin, hei hi Ministry of Corporate Affairs (MCA) duan online portal a ni. He portal hi internship ti turte buaipuina tur platform a ni dawn a, company hrang hrangte tan an company-a intern tih theihnate dah theiha hawn nghal a ni a, October 10 thleng hawnsak an ni.

MCA portal hi Vijayadashami, October 12 aṭangin mipuite tan hman theih a ni ang. October 12 zanlai aṭangin portal-ah hian in ziahluh theih a ni dawn a, company hrang hrang tana candidate-te chu October 26-ah en theih a ni ang. November 27-ah company-te hian an candidate an thlante hi ti chhuakin, December 2 aṭangin internship programme hi neih ṭan tur a ni a, thla 12 a awh ang.

Candidate-te hi financial year 2023-24 chhunga an chhungkaw sum lak luh Rs nuai 8 hnuai lam an ni tur a ni.

He scheme-ah hian company 111 an tel tawh a; Maharashtra, Uttarakhand, Telangana leh Gujarat pawh an tel bawk. Company thawhpui tur hi an Corporate Social Responsibility(CSR) senso dinhmun aṭanga teha thlan niin, firm dang te pawh MCA pawmpuina an dawn hnuah an zawm thei ang.

Thla 12 internship tih chhung hian an hun chanve, thla ruk chhung chu hna tak tak thawhna hmunah hun an hmang dawn a ni. Thla tinin sum lama puihna, Rs 5,000 an dawng bawk a, hei hi sorkarin Rs 4,500 pein company lamin CRS fund aṭangin Rs 500 an pe ang. Hei bakah hian one-time grant, Rs 6,000 an dawng dawn bawk a ni. Scheme hian sorkar scheme kaltlangin insurance pawh a huam dawn a, financial security pawh pek an ni ang. He programme hi ṭhalai kum 21-24 inkarin an dil thei a ni.