West Bengal junior doctor-te la nuar zel

West Bengal-a junior doctor-te chuan RG Kar Hospital-a doctor zirlai, pawngsual leh thah tak tana rorelna dik lekkawh tur leh, an hnathawhna hmuna an himna tur ngaihtuah sak tura phuta nawrh an huaihawt chu an la chhunzawm zel.

Nimin thleng khan sorkar enkawl hospital hrang hranga junior doctor-te chuan an hna an la zawm lo a, Ningani zan 8 vel aṭang khan an awm dan tur ngaihtuahin governing body meeting an nei a, nimin zing lam thleng khan meeting hi nei chhunzawm mah se an thutlukna erawh an la puang lo.

August 9,2024-a RG Kar Medical College and Hospital-a doctor zirlai hmeichhe pakhat rawng taka pawngsual leh thah a nih hnuah, junior doctor-te hian lungawi lohna lantirin nawrh hi an huaihawt a, ni 42 chhung an hnaah an kal lo a ni. Sorkar aiawhte nena ṭum eng emaw zat inbiakna an neih hnuin September 21-ah nawrh ti tawpin an hnaah an kal chhunzawm a, mahse an thil phutte chu thuneituten an ngaihsak tawk lo nia sawiin October 1 aṭang khan hna chawlin lungawi lohna an lantir chhunzawm leh a ni. Senior doctor-te chuan junior doctor-te nawrh hi damlo tam takin an tawrh phah thu sawiin titawp turin an ngen a, hemi hnu hian governing body meeting hi an nei ta a ni.