PM-in fimkhur zual zel turin mipuite a chah

Prime minister Narendra Modi chuan Thawhlehni zan khan TV katlangin ram mipuite hnena thuchah a sawi a, hei hi ram chhunga hripui a len hnuah thuchah a sawi ṭum sarihna a ni. 

PM hian minute 12 chhung thu sawiin, festival season a thleng chho dawn a, mipuite chu inthlahdah lo turin a ngen. Hripui leng vanga ram puma inkharkhip chu tihtawp ni tawh mah se, hri hi ram chhungah a la awm reng a, hei vang hian fimkhur zual zel a ngai a ni, a ti. 

Sorkarin hri darh tur laka invenna atana kaihhruaina a siamte chu zawm turin mipuite a chah a, an chhungkuate venghim ṭheuh turin a ngen. Mask vuah, kut sil ngun leh midang nena inhlata awm chu zawm reng turin a ngen a ni. 

Tun hnaiah thlalak leh video-ahte mi tamtak an inthlahdah chho tih hmuh theihin a awm a, pawn chhuahnaah mask an vuah loh chuan an mahni chauh ni lo, an chhungte thlengin dinhmun hlauhthawnawmah an dah thei a ni, a ti. 

Prime Minister chuan chuan ram pumah Covid-19 kaite enkawlna hmun khum nuai 90 chuang awmna a awm thu sawiin, quarantine centre 12,000 leh coronavirus testing laboratory 2,000 vel a awm bawk a ni, a ti. Test pawh a tam thei ang neih zel niin, test nei tawh zat hi vaibelchhe 10 a tling thuai dawn a, Covid-19 darh zel tur venna chu test neih tam a ni a, chu chu chakna pakhat a ni, a ti. 

Ram hrang hrangten Covid-19 vaccine siam tumin hma an la mek a, India sorkar pawhin theihtawp a chhuah a, vaccine siam chhuah a nih  hunah mitinte hman theih tura chhawpchhuah a nih theih nan ruahmanna pawh a siam mek a ni, tiin Modi chuan a sawi. 

India ram chu hri kai hmuhchhuah tam hle mah se, enkawl dam recovery rate a ṭhain thihpui, fatality rate erawh a hniam hle tih PM chuan a sawi. India ram fatality rate chu developed country ho ai pawhin a hniam zawk a ni, a ti.