Arvind Kejriwal a inah an hreng: AAP

India ram khawpui Delhi-a rorellai, Aam Aadmi Party (AAP) chuan nimin zingah khan thuchhuah siamin an party chief leh Delhi chief minister ni bawk Arvind Kejriwal chu a inah hren a nih thu an sawi a, mahse police-te chuan hei hi an pha thung.

Nimin chawhma lamah khan AAP chuan an twitter-ah Arvind Kejriwal chu BJP Delhi Police-te'n Singhu border-a loneitute a hmuh hnuah a inah chhuah theih loh turin an hreng zui tih tarlangin a inah tumah luha chhuah an phal loh thu an tarlang a ni. Bharat Bandh vangin Chief Minister chu a in an dansak niin an puh.

AAP thupuangtu Saurabh Bhardwaj pawhin nimin khan press conference koin an MLA-te'n CM hmuh an va tum pawh chu kut an lo thlak thu leh kawngpuiah an lo nawr let leh tih a sawi a, party volunteer-te pawh a ina kal an khap tih a sawi bawk.

Delhi Police-te chuan Union Home Ministry aṭanga thupek an hmuh angin, khawpuia mayor pathum civic body-te chu CM in kawtah duh lohna lantir turin an ti tih leh chumi chu remchangah hmangin CM in chu dan a ni tih AAP chuan an sawi a, Kejriwal-a chenna in chu dan vek a nih bakah tumah luh emaw chhuah an phal lo niin an sawi. Nimina a meeting pawimawh neih tur zawng zawng pawh hei vang hian an ṭhulh vek a ni, an ti.

Delhi Police Deputy Commissioner for North District, Anto Alphonse chuan APP puhna chu phatin dawt leh thu belhchian dawl lo a nih thu a sawi ve thung. Arvind Kejriwal chuan nimin piahah pawh zan dar 8-a a in a chhuahsan thu leh dar 10-ah a let leh thu sawiin, engmah buaina a awm lo a ni, a ti ve bawk.