India-US in 2+2 ministerial meeting nei dawn

India leh US chuan  October 26-27 hian New Delhi-ah 2+2 ministerial meeting vawi thumna an nei dawn tih US secretary of defence Mark Esper chuan Thawhlehni khan a sawi.

Meeting nei tur hian Esper leh US secretary of state Mike Pompeo chu India-ah an rawn zin dawn a, India lam aṭangin external affairs minister S Jaishankar leh defence minister Rajnath Singh an tel ve bawk ang.

Meetinga an thu ngaih­tuah tur zingah hian sipai chungchanga an thawhhona tur, Basic Exchange and Coope­ration Agreement (BECA) a tel a ni. Ram pahnihte hian a hmaa meeting an lo nei tawhah khan Logistics Exchange Memorandum of Agreement (LEMOA) leh Communication and Information on Security Memorandum of Agreement (CISMOA)-ah inremna an lo ziak tawh a ni. 

BECA hi geospatial intelli­gence lam hawi, defence atan map leh satellite image-a infor­mation inhrilhhriat tawnna a ni. Uber cab ten ramchhunga hmun an hriat ngai lohna hmun GPS hmanga an thleng thei ang hian BECA kaltlang hian India sipaite chu GPS high quality ṭha tak a neih tir theih dawn a ni. 

LEMOA hi kum 2016 August thla khan India leh US chuan hemi kawnga thawhdunna turin an lo ziak tawh a, kum 2018 September khan ram pahnihte chuan CISMOA chung changah inremna an ziak bawk.CISMOA hi encrypted communications equipment and system lam hawi a ni. 

CISMOA hnuaiah hian India leh US military commander, aircraft leh ship-te chu indona leh indo loh lai pawhin network him tak hmangin an inbepawp  thei a ni.

2+2 ministerial meeting hi kum 2018 khan New Delhi-ah neih a ni tawh a, a vawi hnihna chu kum 2019 khan Washington DC-ah neih a ni thung.