China kutah China sipai man hlan

Eastern Ladakh-a Demchok sector-a Line of Actual Control (LAC) kaltlanga India ram china rawn lut, China sipai corporal Wang Ya Long chu man a nih hnuah Thawhlehni zan khan  Chushul–Moldo meeting point-ah China thuneitute kutah hlan a ni. 

China sipai Wang Ya Long hi Thawhṭanni khan LAC kaltlangin India ram chinah a lut a, sipaite chuan an lo man a ni. An awmna hmun hi a hmun a sangin a vawt hle a, hei vang hian China sipai an man pawh damdawite pek niin ei tur leh thawmhnaw lumte an lo pe nghal bawk. A hnua China sipaite hotute aṭangin an sipai pakhat chin hriat loha a awm thu leh, a awmna chin an hrilh thei em tih ngenna an dawng zui bawk. 

Sipai hlan let a nih hnuah China sorkar chuan thuchhuah siamin, India leh China-in inremna an lo siam tawh angin, an sipai pakhat a chin hriat loha awm chu India chuan Chinese border guard-te kutah a hlan let tih a tarlang.