India rama Covid-19 kai zinga 81.55% an dam leh tawh
India ramah Covid-19 kai pung zel mah se enkawl dam an tam tawh hle a, nimina sorkar report tihchhuah thlengin hri kai zinga 81.55% chu an dam leh tawh.
Ramchhung hmun hrang hrangah Covid-19 kai mi nuai 57 chuang an awm tawh a, chung zinga nuai 46 chuang chu enkawl dam ni tawhin sing kua chuang an thi tawh a; mi nuai 9.6 velin hri an la kai mek bawk a ni.
Hri kai thar aiin enkawl dam an tam leh
Nimina Ministry of Health and Family Welfare-in report an tihchhuahah chuan hri kai hmuh chhuah thar aiin enkawl dam an tam leh a, a zawnin ni ruk chhung chu hri kai hmuh chhuah thar aiin enkawl dam an tam tawh zawk.
India ram pumah Nilaini khan hri kai hmuh chhuah thar mi 86,508 an awm leh a, hetihlai hian dama puan mi 87,374 an awm thung. Mi 1,129 laiin an thihpui leh bawk.
Sorkarin nimina report a tihchhuah thleng khan hri kai hmuh chhuah 57,32,518 an awm tawh a, chung zinga 46,74,987 chu enkawl dam an ni tawh thung. Mi 91,149 in thihpui tawhin 9,66,382-in hri an la kai mek a ni.
MoHFW Report:
Hri kai tawh : 57,32,518
Hri kai mek : 9,66,382
Enkawl dam tawh : 46,74,987
Thihpui : 91,149
India dinhmun
India rama hrikai enkawl dam rate chu 81.55% a ni a, thihpui rate chu 1.59% niin hri kai mek rate chu 16.86% a ni thung. Hri kai tamna ber USA aiin India ramah hian hri kai nuai 14 velin an la tlem zawk a, September 2 aṭang khan nitin mi sang chuangin hri leng hi an thihpui a ni.
Covid-19 vangin union minister a thi
Union minister of state for railway Suresh Angadi chu Nilaini zan dar 8 khan New Delhi-a All India Institute of Medical Sciences (AIIMS) ah Covid-19 vangin a thi.
Kum 65 mi, BJP hruaitu hi September 11 khan Covid-19 a kai tih hriat a ni a, AIIMS Trauma Centre-ah enkawl a nih hnuin Nilaini zan khan a thi a ni. Union minister zingah coronavirus vanga thi hmasa ber a nih bakah, MP zingah hripui vanga thi palina a ni bawk.
Ni khatah sample nuai 11 chuang endik
Indian Council of Medical Research (ICMR) chuan nimina report an tihchhuahah chuan Nilaini khan sample 11,56,569 an endik leh tih an tarlang. Hri len ṭantirh aṭanga nimina report an tihchhuah thleng khan sample 6,74,36,031 an endik tawh a ni.
ICMR hian sample endikna tura laboratory pawmpui 1,810 an nei tawh a, chung zinga 1,082 chu sorkar laboratory niin 728 chu private laboratory a ni thung.