Congress-in ram pum huap nawrh huaihawt

Congress party chuan Lok Sabha-a pass a nih hnua Pathiannia Rajya Sabha-a pass, farm bill pahnih duh lohna lantirin ram pum huapin nawrh a huaihawt.

He bill duh lohna lantir nan ram chhunga loneitu vaibel­chhe hnih chuang signature lakhawm turin campaign an nei dawn tih Congress chuan a sawi bawk a, hei hi Preisdent Ram Nath Kovind hnenah farm bill-te hi sut leh tura ngenin an thehlut dawn tih an sawi. 

Farm bill hi Congress party bakah CPI-M, CPI, TMC, NCP, Samajwadi Party, Shiv Sena, RJD, DMK, TRS, AAP, IUML, Kerala Congress (M) chuan Loktantrik Janata Dal-ten an duh lo a ni. Rajya Sabha-a opposition leader, Congress MP Ghulam Nabi Azad chuan Nilaini khan eptu party 18-te aiawhin President a hmu a, House-a pass tak farm bill-te hi pawmsak lo turin a ngen. 

Hetih lai hian rorellai, BJP chuan farm bill a ṭhat zia mipuite hrilh hre turin ram pum huap campagin neih a tum ve bawk. Eptu lamin MSP (Minimum Support Price) chungchanga thu dik tawk an sawite chu sawifiah an tum tih an sawi. 

Farm bill pass tak pahnihte hi Farmers (Empowerment and Protection) Agreement on Price Assurance and Farm Services Bill, 2020 leh Farming Produce Trade and Commerce (Promotion and Facilitation) Bill, 2020-te an ni.