Ladakh Bhawan-ah Wangchuk-a'n chaw ngheia nawrh a ṭan

Climate activist Sonam Wangchuk chuan Delhi-a Jantar Mantar a lungawi lohna lantir an tumna Delhi Police ten an hnawl sak hnuah, Pathianni khan Delhi-a Ladakh Bhawan ah chaw ngheia nawrh a nei ṭan.

"New Delhi-a hmun lun laia chaw ngheia nawrh kan tumna hrang hrangte a remchan theih tak loh avangin, ni li chhung min lo hren tawhna Ladakh Bhawan, New Delhi-ah chaw ngheia nawrh chu kan ṭan ta a ni" tiin social media lamah a tarlang.

Kum 58 mi, Wangchuk hian Ladakh Union Territory chu state puitlinga hlankai leh, Sixth Schedule status pek a phut a ni. An thil phut nawrna atan hian 'Delhi Chalo Padyatra' neiin, Leh aṭangin Delhi pan hian kawng an zawh a ni. Delhi ramri an thlen hnuah khawpui chhung an lut tur chu September 30 khan Delhi police-ten lo dangin an hreng a, October 1 khan chhuah niin a tuk zingah an hren chhunzawm leh a ni. Mahse October 2 tlai lamah chhuah lehin, chhuah a nih hian Mahatma Gandhi zahna chibai buk turin Raj Ghat an pan nghal a ni.

Leh aṭanga Delhi an pannaah hian km 1,000 chuang kalin, amah thlawptu mi 150 dawnin an zui bawk.