Fakna dik lo vangin mit thlawr ti tawp lailawk

ENTOD Pharmaceuticals in an mit thlawr (eye drop) damdawi fakna atana fakna dik tawk lo an hman avangin siam leh hralhchhuah phalna pek chu tihtawp lailawk sak an ni.

RTI activist KV Babu-a'n damdawi siamchhuaktu company ten Drug and Mgic Remedies (Objectionable Advertisement) Act,1954 an bawhchhia tih a tarlan hnuah, Central Drugs Standard Control Organisation (CDSCO) chuan Gujarat drug control authority chu rang taka hma la thuai turin a hrilh.

DMR Act hnuaiah hian natna hrang hrang 54 enkawlna atana damdawi fakna neih khap a ni a, he dan hian mit lam natna leh ṭhat lohna lam tidam hmiah thei ang zawnga fakna siam a khap tel. Presbyopia hi mit lam fel lohna thlen thei natna chi khat niin, he natna tidam thei ang zawnga fakna siam chu DMR Act 1954, section 3(d) hnuaiah hian khap a ni. He dan hnuaia damdawi fakna siam phal loh zingah hian cancer, diabetes, thluak lam fel lo leh natna enkawlna, chhul lam natna, nervous system epilepsy, fits, gallstones, kidney stones, leh bladder stones, lung natna, BP sang leh hniam, veberal diseases, phar, obesity, sexual impotence leh Tuberculosis enkawlna damdawi te pawh an tel.

"Mi thiamte chauhin an chawh ngai damdawi fakna siam hi phal a ni lo a, mahse mit thlawr damdawi siamtute hian press conference leh tweet hmangin a fakna hi an tarlang a, chiang takin DMR Act hi an bawhchhia a ni," tiin Babu hian a sawi.

CDSCO hian September 10 khan Mumbai-a hmunpui nei company hnenah hian thu leh awm hma zawng chu an damdawi siamchhuah leh zawrh phalna te chu an lo tihtawp lailawk sak tawh a, Drug Controller General of India (DCGI) Dr Rajeev Singh Raghuvanshi pawhin company ten fakna an siam chungchangah hian insawifiahna nei turin a hrilh hre tawh bawk.