Chennai Airshow entu mi 5 in nunna chan

Chennai Marina Beach-a Pathiannia airshow buatsaih entute innekbuaina avangin mi panga an thi a, mi 150 chuang an hliam.

Indian Air Force 92nd anniversary puala October 6-a air show buatsaih hi kum 20 chuang hnua Chennai-a neih leh hmasa ber a ni a, en tuma pungkhawm pawh a tam hle a, mi nuai 12 chuang an tling a ni. Mipui pungkhawmte hi show neih zawha an haw tur chu an innekbuai a ni.

IAF in Limca Book of World Record - ziah luh theih tur a record thar siam tum a, mipui nuai 15 chhim tu awm tir an tumna chuan he chhiatna hi a thlen nia sawi a ni. Hei bakah Chennai City Police ten mipui pungkhawm kaihhruai dan leh traffic enkawl dan mumal an neih loh avanga harsatna thleng chuan zawhna a ti tam hle bawk.

Airshow neih hma hian buaina engmah a awm hran lo a, mahse show ṭan dawn chawhma dar 11 vel aṭangin mipui nasa taka pun belhin, show neih lai mek pawhin an buai ṭan tawh nia sawi a ni. MST railway station te leh Marina Beach kawngpuite chu mihringin an khat vek a ni. Mihring an tam lutuk avangin ṭhenkhat chu chau a lo thidang tawk pawh an awm.

Hetih lai hian Chennai police chuan mipui pungkhawmte veng tur hian police 6,500 leh home guard 1,500 dah an ni tih an sawi a, mahse pungkhawm hi an tam tak em vangin an thunun hlei thei lo a ni.

Airshow-ah hian 72 aircraft, including Rafale, indigenously manufactured state-of-the-art Light Combat Aircraft Tejas, Light Combat helicopter Prachand, leh Heritage aircraft Dakota te pho lan a ni a, Special Garud Force commando-te pawhin show hi an nei bawk a ni.