PM Modi leh Maldives President Muizzu inkawm

Prime minister Narendra Modi leh Maldives president Mohamed Muizzu te chu nimin khan New Delhi-a Hyderabad House-ah an inkawm a, ram pahnihte thawhdunna changtlung leh nghet zawk neih theih dan turte an sawidun.

Maldive President Muizzu hi ni li cham turin a rawn zin a ni. Nimina PM Modi nena inkawmna an neihah hian USD tmd 400 hu currency swap agreement an ziak a, hei hi Maldives-in foreign exchange reserve chungchang harsatna a neihte sutkian kawnga a puih theih beisei a ni.

Ram hruaitu pahnihte hian Maldives-a Rupay card hmanna tur an tlangzarh nghal a, hei bakah Hanimadhoo International airport runway an hawng bawk. Modi chuan India leh Maldives hian economy lama ram pahnihte inzawmna ti nghet zual turin Free Trade Agreement chungchang pawh sawiho an remti tih a sawi.

PM Modi chuan Maldives chu India ram ṭhianṭha tak a ni tiin, a ṭhenawm ram tana policy a siam leh SAGAR vision-ah hmun pawimawh tak a chang niin a talrang.