Eptute tel loin Rajya Sabha-ah bill 15 pass

Eptu party-ten Parliament in hnih rorel an boycott laiin, ni hnih chhunga eptu member-te telloin Rajya Sabha-ah bill 15 pass a ni. 

Thawhlehni khan bill pasarih pass a ni a, Nilainiah pariat pass a ni. Bill pass thar zinga pathum hi labour law niin, eptute bakah labour union pawhin nasa taka an dodal a ni. Hei bakah hian BJP ideological mentor, Rashtriya Swayamsevak Sangh (RSS) kaihhnawih bill pakhat pass tel a ni bawk. 

Pathianni khan Rajya Sabha-a farm bill chungchang sawiho a nih ṭuma an chetdan a mawi loh avanga eptu member pariat suspend an nih avangin eptu party-te hi an lungawi lo a ni. House chairman Venkaiah Naidu chuan member suspend chu thiltih hrehawm tak ni mah se tih ngei a ṭul  niin a sawi. Eptute chuan an lungawi lohna tilang turin dikna an nei a, mahse an tihlan dan erawh an ngaihtuah ṭhat a ngai, a ti. House zahawmna vawnnun chu a tihtur a nih thu a sawi bawk. 

Eptu party-ten an lungawi loh avanga rorel  inkhawm an boycott chu ṭha a tih loh thu sawiin, an boycott chuan an ngaihdan sawichhuahna hun ṭha an chan zawk a ni, a ti. Farm bill chungchangah vote lak tura eptu lam hian physical voting neih an phut a, mahse Deputy Chairman Harivansh Singh chuan a remtih loh avangin lungawi loin eptu member-te hi House laiah chhuakin paper-te an pawtthler a, microphone-te tihchhiat an tum a ni.